Oculis tryggir sér um 80 milljónir bandaríkjadala í lokuðu hlutafjárútboði
Augnlyfjaþróunarfélagið Oculis, sem vinnur að þróun nýrra lyfja til meðhöndlunar á alvarlegum augnsjúkdómum, hefur tilkynnt um PIPE fjármögnun upp á um 80 milljónir bandaríkjadala samhliða fyrirhugaðri skráningu félagsins í Bandarísku kauphöllina NASDAQ. Skráningin mun fara fram með sameiningu Oculis og sérhæfða yfirtökufélagsins (e. SPAC) European Biotech Acquisition Corp („EBAC“), en tilkynnt var um samrunasamning félaganna tveggja í dag. Gert er ráð fyrir að þegar sameining Oculis og EBAC hefur að fullu gengið í gegn, sem ráðgert er að verði á fyrri hluta árs 2023, muni heildarvirði (e. Enterprise Value) Oculis nema um 220 milljónum dala og félagið með sjóðstöðu yfir 200 milljónum dala, að því gefnu að engar innlausnir verði í EBAC.
Oculis á rætur að rekja til Háskóla Íslands og Landspítala, en félagið var stofnað af Dr. Einari Stefánssyni, prófessor í augnlækningum og Dr. Þorsteini Loftssyni, prófessor í lyfjafræði. Það lyf sem lengst er komið í þróun hjá Oculis, OCS-01, byggir á einkaleyfavarinni tækni, sem gerir mögulegt að meðhöndla sjúkdóma í afturhluta augans með augndropum. OCS-01 er í dag í alþjóðlegum fasa 3 klínískum prófunum til meðhöndlunar á sjónhimnubjúg í sykursýki og gæti orðið fyrsta lyfið í formi augndropa til meðhöndlunar á sjúkdóm í afturhluta augans.
Fyrsta vísisfjármögnun félagsins (Series A) fór fram árið 2016 og var leidd af Brunni vaxtarsjóði og Silfurbergi. Í árslok 2017 urðu vatnaskil í starfsemi Oculis þegar þrír erlendir vísisjóðir komu að félaginu (Series B1). Í kjölfar þess var sett upp móðurfélag og höfuðstöðvar í Sviss. Á sama tíma var rannsóknarstarfsemi félagins efld, m.a. með nýrri rannsóknaraðstöðu og fjölgun starfsmanna á Íslandi. Frekari vísifjármagnanir hafa fylgt, en í ársbyrjun 2019 var tilkynnt um Series B2 fjármögnun og í maí 2021 um Series C fjármögnun Oculis. Samtals hefur Oculis til dagsins í dag sótt um $110m í fjármagn til rannsóknar og þróunar nýrra augnlyfja.
Skilar Oculis allt að 200 milljónum dala
Gert er ráð fyrir að sameining fyrirtækjanna geti skilað Oculis yfir 200 milljónum dala (ef gert er ráð fyrir engum innlausnum). Þetta felur í sér 127,5 milljóna dala innspýtingu reiðufjár sem kemur úr sjóðum EBAC (ef gert er ráð fyrir engum innlausnum) og tæpar 80 milljónir dala með lokuðu hlutafjárútboði („PIPE-fjármögnun“), þar af um fjórðungur frá íslenskum fjárfestum sem samanstanda af lífeyrissjóðum, verðbréfasjóðum, tryggingafélögum og öðrum fjárfestingarfélögum.
Meðal kjölfestufjárfesta í PIPE-fjármögnuninni eru LSP 7, einn stærsti líftæknisjóður Evrópu, Earlybird, Novartis Venture Fund, Pivotal bioVenture Partners, Tekla Capital Management LLC og VI Partners, meðal annarra.
Arctica Finance var ráðgjafi EBAC í tengslum við fjárfestingu íslenskra aðila í PIPE fjármögnuninni, en aðrir ráðgjafar voru Bank of America, SVB Securities, Credit Suiss og Kempen. Lögfræðiráðgjafar í tengslum við viðskiptin voru Cooley (UK) LLP, VISCHER SA, SA. Davis Polk & Wardwell LLP, Stibbe N.V., Maples Group, Shearman & Sterling LLP og BBA//Fjeldco.
Nánari upplýsingar um samruna félaganna má finna hér