Undirritað hefur verið samkomulag um kaup IS HAF fjárfestingar slhf. á 40% hlut í íslenska tæknifyrirtækinu KAPP. Til viðbótar ætlar sjóðurinn að leggja félaginu til aukið hlutafé til frekari vaxtar.
IS Haf fjárfestingar slhf. er nýr sjóður í rekstri Íslandssjóða hf. sem fjárfestir í haftengdri starfsemi á breiðum grunni. Sjóðurinn er 10 milljarðar að stærð en stærstu fjárfestar sjóðsins eru íslenskir lífeyrissjóðir, Brim hf. og Útgerðarfélag Reykjavíkur hf. sem er kjölfestufjárfestir í sjóðnum.
KAPP er tæknifyrirtæki sem sérhæfir sig í kæliþjónustu, vélasmíði, framleiðslu, sölu og þjónustu á ýmsum tækjabúnaði fyrir sjávarútveginn, fiskeldi og annan iðnað. Félagið er auk þess umboðs- og þjónustuaðili erlendra framleiðenda á vörum sem tengjast starfsemi félagsins.
„Forskot í framþróun kælibúnaðar fyrir sjávarútveginn, öflug uppbygging stofnenda KAPP og veruleg vaxtartækifæri er grundvöllur fjárfestingar IS Haf í KAPP. Sú þekking, reynsla og sérhæfing sem býr í mannauði KAPP er framúrskarandi og mun aðkoma sjóðsins styðja við metnaðarfulla vegferð í vexti félagsins í haftengdri tækni bæði innanlands sem utan," segir Kristrún Auður Viðarsdóttir framkvæmdastjóri IS Haf fjárfestinga slhf.
Fyrirtækjaráðgjöf Arctica Finance var ráðgjafi KAPP í tengslum við fjárfestingu sjóðsins.
