Um Arctica

ORF Líftækni hf. hefur lokið hlutafjáraukningu upp á um 300 milljónir króna í samstarfi við Arctica Finance. Fjórtán innlendir og erlendir fjárfestar tóku þátt í hlutafjáraukningunni og var umframáskrift 13,7%.

Fjármagnið hyggst ORF Líftækni nýta til áframhaldandi uppbyggingar á framleiðslu fyrirtækisins og til aukins markaðsstarfs erlendis. Hluthafar félagsins eftir hlutafjáraukninguna eru um 80 talsins. Hjá ORF Líftækni starfa nú um 40 manns.

Garðabær hefur í samstarfi við Arctica Finance gefið út skuldabréfaflokk vegna lántöku að fjárhæð kr. 500 milljónir. Um er að ræða verðtryggt lán til 40 ára með 3,8% föstum ársvöxtum. Andvirði lánsins verður varið til framkvæmda við nýtt hjúkrunarheimili sem rís á Sjálandi í Garðabæ.

Gunnar Einarsson bæjarstjóri segir lánskjörin sem Garðabær fái með útgáfu þessa skuldabréfaflokks séu með því besta sem þekkist á markaði í dag. “Kjörin endurspegla góða fjárhagsstöðu sveitarfélagsins og lýsa trausti fjárfesta á stjórnun þess,” segir Gunnar.

Fyrirhugað er að taka nýja hjúkrunarheimilið á Sjálandi í notkun í ársbyrjun 2013. Ríkið greiðir 85% af stofnkostnaði þess en Garðabær þau 15% sem upp á vantar.

Undirritaður hefur verið samningur um kaup BMV Holding ehf. á B.M. Vallá ehf. frá Eignabjargi ehf., dótturfélagi Arion banka. Hluthafar BMV Holding eru Norcem á Íslandi ehf., Björgun ehf., Jarðefnaiðnaður ehf., Suðurhraun ehf.,  Hlér ehf., Harðbakur ehf. og Suðurverk hf.

Arctica Finance og Logos Lögmannsþjónusta voru ráðgjafar kaupenda í söluferlinu.

Samningurinn er gerður með fyrirvara um samþykki Samkeppniseftirlitsins.

Arctica Finance hefur flutt skrifstofur sínar á 14. hæð í turninum að Höfðatorgi, Reykjavík. Höfuðstöðvar Arctica Finance voru upphaflega þar skammt frá í Hátúni, en síðustu 3 ár var Arctica Finance til húsa á 12. hæð í turninum við Smáratorg í Kópavogi. Leiðin liggur því upp á við!